កោះកុង៖ អណ្តើកសមុទ្រ (ល្មិច) ១ក្បាលទម្ងន់ ១៤គីឡូក្រាមដែលអ្នកនេសាទម្នាក់នេសាទបាន ត្រូវបានលែងចូលក្នុងសមុទ្រវិញកាលពីថ្ងៃទី០៣ ខែកុម្ភៈ ឆ្នាំ២០២៤។

រដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ បានកោតសរសើរចំពោះលោក ស៊ុន ច័ន្ទបុត្រ អាយុ ៣២ឆ្នាំ មានទីលំនៅភូមិពាមក្រសោប ឃុំពាមក្រសោប ស្រុកមណ្ឌលសីមា ខេត្តកោះកុង ដែលនេសាទបានអណ្តើកសមុទ្រ ហើយលែងទៅវិញ ដែលសកម្មភាពនេះជាគំរូដ៏ល្អនិងមានតម្លៃមិនអាចកាត់ថ្លៃបាន ក្នុងការរួមចំណែកថែរក្សា ការពារ និងអភិរក្ស ប្រភេទអណ្ដើកសមុទ្រដែលជិតផុតពូជនេះឱ្យបន្តមានវត្តមាននៅដែនទឹកធម្មជាតិសម្រាប់កូនចៅជំនាន់ក្រោយៗទៀត។

ល្មិច ឬសត្វកន្ធាយក្បាលកង្កែប ឬអណ្តើកសមុទ្រ មានឈ្មោះជាវិទ្យាសាស្ត្រ Pelochelys cantorii ត្រូវបានកំណត់ក្នុងបញ្ជីក្រហមរបស់ IUCN ថាជាប្រភេទសត្វដែលរងការគំរាមកំហែងជាសកល។

ក្នុងរដូវពងកូនសត្វល្មិចជារៀងរាល់ឆ្នាំ ពលរដ្ឋក្នុងសហគមន៍តែងប្រទះឃើញសម្បុក ហើយត្រូវបានក្រុមការពារអភិរក្សប្រមូលយកថែទាំងរហូតដល់ញាស់ដើម្បីលែងវាត្រឡប់ទៅដែនជម្រកធម្មជាតិរបស់វាវិញ៕